Corne se blog

Algebra

corne — Wed, 09 Jun 2010 14:59:15 +0000

om trigonometrie oor jou lippe te laat rol
is alreeds ‘n mondvol
om Pythagoras heeltemal te verstaan -
dis ‘n ander wentelbaan!

syfers, getalle en formules
orden gedagtes in ‘n linnie
dit wys ons dat daar iets is
wat ons nie eers kan sien nie!

optel, aftrek, maal en deel
selfs differensiasie
ontwikkel lobbe, links en regs
‘n intelligente nasie!

satan self moes dié plan ontwikkel
om kinders te laat sukkel
haal wiskunde uit en kyk
hoe onderwys oor 20 jaar lyk!

Kroonstad 14 Oktober 2008

corne — Sat, 01 Nov 2008 08:03:54 +0000

Hierdie was ‘n fantastiese geleentheid, maar ongelukkig het een of ander siek siel sy gemors advertensies bo-oor my verslag kom laai (nugter weet hoe hulle dit doen!), so ek kan nie eers al die details onthou van wie betrokke was nie. Dit was baie lekker en ons het daarna weer baie kontak gehad met mense in die Vrystaat. Party het selfs huisvriende geword!

Kos en Konsert, 31 Mei 08

corne — Mon, 11 Aug 2008 19:07:02 +0000

Ons eerste Kos en Konsert was ‘n heerlike sukses! Vir die wat nie weet nie, ek en Heidi maak heerlike, eksotiese kos wat jy nie sommer aldag raakloop nie. Ons kombineer dit met ons oorspronklike Afrikaanse musiek en daar het ons ‘n wenresep. Dit is uniek en eksklusief oor 2 redes. Eerstens is dit vir hoogstens 24 mense op ‘n slag en tweedens oor die kos. Dit word aangebied by ons huis in Pierre van Ryneveld in ‘n knus en romantiese atmosfeer.

Te oordeel aan die reaksie van die mense wat daar was, dink ek ons sal dit gereeld moet doen. Hier is ‘n paar kommentare:

Vir die wat wonder oor die kos, hier volg die spyskaart:

Voorgereg: Botterskorsiesop: Ryk en fluweelsag met ‘n sweempie sitrus en speserye.
Hoofgereg: Mediterreense Lamsroulade, gemarineer met olyfolie, vars knoffel, roosmaryntakkies uit die tuin en suurlemoensap, gevul met songedroogde tamaties en swart olywe, bedien met lintnoedels met ‘n varsbereide basilie-pestosous en peperonata.
Nagereg: Klam donkersjokolade gebakte poedinkies met gepreserveerde lemoensnytjies, bedruip met ‘n lemoenstropie, bedien met dik room en sjokoladegedoopte koemkwarte.
Koffie / Rooibostee.
Konsert: Wonderlike musiek en 2 bottels wyn per tafel van ses, gratis en verniet ingesluit.

Standerton Skou, 1 Augustus 2008

corne — Mon, 11 Aug 2008 19:06:13 +0000

Ons was Vrydag 1 Augustus by Standerton se skou. Saam met my en Heidi was LeRoy, Theuns Jordaan en Snotkop deel van die aand se vermaak. En was dit nou vir jou lekker! Daar is min dinge soos plattelandse gasvryheid en hulle het mooi uitgehaal. Ons het in ‘n fantastiese nuwe gastehuis op die dorp oornag. Julle moet asseblief tog die plek self gaan beleef as julle daar rond is. Die interieur is beter as 99% van die hotelle waar ek al was. Die gastehuis se naam is Appledew. Daar was ‘n reuse tent propvol mense wat waarderend gelyk en geklink het, so baie dankie aan almal. Ek hoop regtig ons kan weer so maak. My hartelike dank aan die feeskommitee, spesifiek Alida, Elize, Dorette en Jaco. Laaste maar nie die minste nie; Standerton is my geboortedorp! Ek het geen herhinneringe aan die plek nie. Ons is weg nog voor my brein aan my rug vasgegroei het, maar die papiere sê so.

Golgota

corne — Mon, 11 Aug 2008 18:14:35 +0000

doringkroon
skare stom
kleed verdeel
die vraag, waarom?

ligrooi bloed
donker hout
die aarde skeur
‘n liggaam koud

sondeval
so afhanklik
God se liefde
triomfantlik!

Golgota by Corné Dannhauser is licensed under a Creative Commons Attribution-Noncommercial-No Derivative Works 2.5 South Africa License.



Kritiek
corne — Mon, 11 Aug 2008 18:13:01 +0000
Askies tog, mevrou

slegs enkele gedagtes vir jou om te herkou

terwyl jy my skeppingswerk aanskou
Dis ‘n stukkie van myself, ‘n hoekie van my siel

wat na bloedende geboortepyn stadigaan die lig sien

vir jou dalk leë woorde of beelde op doek

maar dis ek wat versigtig die waarheid in en om my soek
Natuurlik mag jy jou opinie gee, jou insig met ons deel

maar die stand van my hare en die kleur van my skoene

pla jou duidelik te veel

met jou skerp tong mag jy voortveg, jou swaard in my steek

maar op my keuse van vrou en naam van my kind

mag jy jou nie wreek
So, asseblief mevrou

ek is seker as jy wou, sou jy jou kon hou

by die onderwerp ter sake



Kritiek by Corné Dannhauser is licensed under a Creative Commons Attribution-Noncommercial-No Derivative Works 2.5 South Africa License.




Klaas Vakie
corne — Tue, 02 Oct 2007 12:50:39 +0000
klingend roep Klaas

vou jou toe in ‘n waas

jy sit jou teë

word sag meegeslee
ogies flikker

mondjie pruil bitter

pupille wat ronddwaal

rustig asemhaal
pyn in my hart

glad nie van smart

my engel aan’t rondsweef

waar liefde en drome leef



Klaas Vakie by Corné Dannhauser is licensed under a Creative Commons Attribution-Noncommercial-No Derivative Works 2.5 South Africa License.




Lentelief
corne — Tue, 02 Oct 2007 12:47:51 +0000
Die lente draai die winter op sy rug

En met ‘n glimlag bring sy die son weer terug

Met sitrusgeur op haar asem

Waai sy die varsheid terug oor my
Die lente speel, die lente lok

Sy trippel rond en sy swaai haar rok

Haar bloeisel blom in ‘n glimlag

Sy spoel lewe terug oor my
Die lente streel oor my gesig

Sy swaai my rond in vars, skoon lug

Sy slaan my asem weg
Die lente warrel voor my uit

Verwar my met haar beeldskoonheid

Sy maak my knieë lam
Sy steel my hart

Sy steel my hart

Lentelief by Corné Dannhauser is licensed under a Creative Commons Attribution-Noncommercial-No Derivative Works 2.5 South Africa License.



Privaat funksies
corne — Tue, 02 Oct 2007 12:40:31 +0000
Hierdie is net om julle te laat weet wat die privaat funksies op my kalender is. Dis net funksies wat nie oop is vir die publiek nie. Jy sal nie ‘n kaartjie kan koop om te kom luister nie.



Alice Art Gallery
corne — Tue, 28 Aug 2007 12:14:38 +0000
Op 3 Augustus 2007 het ek en Heidi Bouwer hierdie pragtige venue gebruik vir ons konsert. Daar was heerlike fillet met ‘n bloukaassous en groente om te pas by die kunswerke. Dan natuurlik het ons heerlik opgetree, soos altyd. Die verrassing was die hoeveelheid CD’s wat ons verkoop het vir die hoeveelheid mense. As almal so paraat is sal my bankbestuurder persoonlik by ons kom kuier!